Memtiin hoshur – Uyghur hazirqi zaman edebiyatidiki közge körüngen we muhim orunni igiligen yazghuchilardin biridur. U asasliqi proza saheside muhim eserlerni wujudqa keltürüp, Uyghur hazirqi zaman edebiyatining tereqqiyatida belgilik töhpe qoshqan. U hazir junggo yazghuchilar jemiyitinng ezasi.
Qisqiche hayati
Yazghuchi Memtimin Hoshur 1944-yili ghulja shehiride tughulghan. 1962-Yili ghulja sheherlik 3-ottura mektepni, 1967-yili shinjang uniwérsitétining til-edebiyat fakoltétini püttürgen. 1968-Yilidin 1972-yilighiche ghulja sheherlik baghwenchilik meydanida qayta terbiyide bolghan, 1972-yilidin 1975-yilighiche ghulja shehiri képekyüzi yézisida xelq ishliri kadiri, 1975-yilidin 1979-yilighiche ghulja sheherlik sheher qurulushi idariside teshwiqat kadiri qatarliq xizmetlerni ishligen.
Yazghuchiliq hayati
Memtimin Hoshur 1979-yilidin 1995-yilighiche «ili deryasi» zhornilida muherrir, bash muherrir, ili oblastliq yazghuchilar jemiyitining kespiy yazghuchisi we muawin reis qatarliq wezipilerni ötigen.
1995-Yilidin 2006-yilighiche shinjang Uyghur aptonom rayonluq yazghuchilar jemiyitining reisi bolghan.
U hazir junggo yazghuchilar jemiyitining heyet ezasi, yazghuchining «alma» namliq tunji hékayisi 1965-yili «shinjang géziti» de élan qilinghan. 1978-Yilidin hazirghiche memliket ichidiki herxil metbuatlarda 120 parchidin artuq hékaye, powést, eslime we edebiyat, tarixqa ait ilmiy maqaliliri, «qum basqan sheher» namliq romani élan qilindi hemde asasliq hékayilirining hemmisi dégüdek xenzuchigha terjime qilinip élan qilinghan.
«Sawaqdashlar» namliq powéstlar toplimi özbék tiligha, «ayxan» namliq hékayiler toplimi qazaq tiligha, «it étish», «görkar» namliq hékayiliri qirghiz tiligha terjime qilinip qazaqistan, özbékistan qatarliq ellerde neshr qilinghan (menbe- Memtimin Hoshurning «qum basqan sheher» namliq roman).
Kitabliri we eserliri
Uning hazirghiche neshrdin chiqqan kitabliri:
«Ney awazi» – (hékayiler toplimi, shinjang xelq neshriyati)
«Kona – yéngi ishlar» – (hékayiler toplimi, Milletler Neshriyati)
«Salam, hisam aka» – (powéstlar toplimi, shinjang yashlar – ösmürler neshriyati)
«Bu chüsh emes» – (hékayiler toplimi, shinjang xelq neshriyati)
«Nozugüm» – (powést, mongghul tilida, shinjang xelq neshriyati)
«Yillar shundaq ötken» – (biografiyilik qisse, shinjang xelq neshriyati)
«Ölükke xet» – (hékayiler toplimi, qeshqer Uyghur neshriyati)
«On ikki muqamning ili wariyanti» – (ilmiy eser, shinjang xelq neshriyati)
«Ayxan» – (hékayiler toplimi, qazaq tilida, shinjang xelq neshriyati)
Shinjang xelq neshriyati yene uning hékaye, powéstliridin tallap «Memtimin Hoshur tallanma eserliri <1>, <2>, <3>» din ibaret üch kitabni neshr qildi. Yéqinda yene uning «qirliq istakan» xenzu tilida (yashlar – ösmürler neshriyati) , «ot ketken derya»(xelq neshriyati) qatarliq hékaye toplamliri élan qilindi. Bir qisim hékaye we powést toplamliri memliketlik we aptonom rayon dairisidiki herxil mukapatlargha érishti.
2006-Yili 6-ayda uning «ili xelq naxshilirining tarixiy bayani» namliq kitabi Milletler Neshriyati teripidin neshr qilindi.
«Tarim» perwishidiki Memtimin Hoshur
Abduréshit osman
(Ghulja sheherlik 3-ottura mektep)
Yillar néme dégen téz ötidu, mana qarang, «tarim» zhornili 1950-yili neshir qilinip, keng oqurmenlerning qelb bostanini sughirip kélwatqinigha hesh-pesh dégüche 66 yil boluptu. 66 Yil qarimaqqa birdemlik kechmish shamal yaki sanimaqqa addiy san bolghini bilen, u öz béshidin 66 bahar, 66 yaz, 66 küz, 66 qishning ajayip kechmishlirini birmu bir ötküzüp, turmush hékmetlirini senet yükseklikige kötürüp, bediiy kamaliti bilen el-awamni söyündürup kelgen 66 yildur.
«Tarim» zhornilidin ibaret bu zemzem bulaq 66 yildin béri peqet sekkiz yilla soghulup qalghanni hésabqa almighanda («tarim» zhornili «medeniyet zor inqilabi» ning tesiri bilen 1966-yilliq 4-sandin neshir qilinishtin toxtap qilip, 1974-yili 1-sandin bashlap qayta neshir qilinishqa bashlighan) bir qétimmu soghulup baqmidi. Belki bu bulaqning süyi aqqanséri téximu ulghiyip, téximu mewj urup, öz qoynini-baghrini téximu yashartip, beeyni gül-chéchekke pürkengen baghu-bostanliqqa aylandi. Shundaq «tarim» zhornili 2016-yili neq 66 yashqa kirdi, biz uning 66 yilliq sehipisni birmu bir waraqlap baqsaq, uning ünche-merwayit bilen liq tolghan tektige yenimu téren shungghup baqsaq, uning gül-chécheklerge pürgengen baghu-bostanlirini qanghiche seyle qilip baqsaq, uning tekti-esraridin «hemme güller tekshi échilish, hemme éqimlar bes-beste sayrash» tek partiyining edebiyat –senet fangjénida bashtin-axir ching turghanliqidek heqiqetni bayqaymiz.
«Tarim» zhornili aptonom rayonimizdiki edebiy zhornallar ichidiki bir «ana» zhornal. Bu«ana» eyni yillardiki nurghun edebiyat hérismenlirining edebiy ijadiyet böshüki bolghan. «Tarim» zhornilidin ibaret bu japakesh, aqköngül, qeyser«ana» nurghun talant igilirini özining illiq qoynida yénikkine elleylep, pepilep qatargha qoshti.
Eyni yillarda «tarim» zhornili Memtimin Hoshurgha oxshash nurghun edebiyat hérismenlirining qoldin qolgha ötküzüp oquydighan birdinbir oqushluqi, ijadiyet böshüki we beyge meydani bolghanidi. Bu heqte yazghuchi Memtimin Hoshur «tarim» zhornili neshir qilinghanliqining 40yilliqigha atap yazghan« ‹tarim› bediiy yétekchim» namliq maqalisida mundaq dep yazidu: « ‹tarim› zhornilining her bir yéngi sanini qolumgha alghinimda, xuddi bir qedinas dostum, yéqin söhbetdishim bilen uchriship qalghandek xushal bolup kétimen. ‹Tarim› zhornilining zadi qaysi zamanlardin bashlap neshr qilinghanliqini, bu ‹dostum›bilen tonushqanliqimning qachandin bashlanghanliqini esliyelmeymen. Bu zhornal manga ezeldinla mewjuttek bilinidu. Men bu zhornalsiz turmushimizni, millitimizning omumy meniwi hayatin köz aldimgha keltürelmeymen. Ishqilip, men ésimni tapqandin béri bu zhornalni kishlerning qolida körettim. Ottura mektepning bosughisigha qedem qoyghandin bashlap uni mektep qiraetxanisining zhornallarni qoyidighan tekchisidin izdeydighan bolghanidim. Bu zhornal köp waraqdalghachqa, patla pétidin chüshüp yéngi waqtidikige qarighanda köpüp, semirip qalghandek bolup qalatti. Andin qiraetxanimizning tirshchan xizmetchisi zhornalning yirtilghan yerlirini qattiq qeghezde chaplap, bir qanche sanlirini bir qilip tüplep qoyatti. Bu uning oqughuchilirining köplükining, qedirlikilikining belgisi idi. Zhornalni échishim bilenla etrapimdiki hemme némini untuyttim-de, uning ichidiki shéir, qoshaqlargha mehliya bolup, hékaye, chöcheklerning weqelikliri ichige kirip kitettim. Kéyin mektipimizde edebiyat kurzhuki teshkillendi. Kurzhuktiki asasliq öginish matiriyalimizmu «tarim» (eyni yillardiki «shinjang edebiyat -seniti» ) zhornili idi. Méning bu zhornalning ilhami bilen yazghan deslepki shéirlirim «pionérlar géziti» (hazirqi «shinjang ösmürliri» ) ge bésildi. Kéyinche bir ikki nesiriy esirim «shinjang géziti» de élan qilindi. «Tarim» zhorniligha eser yazdighan kishlerni men katta yazghuchi, shairlar dep bilettim. Némishqidur, ularning köpinchisini chachliri shalanglighan, közige parqiraq girweklik közeynek taqighan. Aldigha sel éngiship mangidighan, oruq, égiz boyluq ademler siyaqida köz aldimgha keltürettim. Shunglashqimikin oqughuchiliq mezgilimde ‹tarim› zhorniligha eser ewetishke zadila jüret qilalmayttim.
‹Medeniyet zor inqilabi› mezgilide ‹tarim› zhornili bir qanche yil neshr qilinishtin toxtap qaldi. Zhornalning héliqi tirishchan kutupxana xadimliri bilen ixlasmen mushtirliri chaplap, tüplep qoyghan kona sanliri bizdek heweskarlarning téximu qedirlep, qoldin qolgha élip oquydighan qimmetlik oqushluqi bolup qaldi.» («Tarim»zhornili 1990-yilliq 9-san).
Memtimin Hoshur 1965-yilliri shinjang uniwérsitétida oquwatqan chaghlirida « alma »namliq tunji hékaysi «shinjang géziti» de élan qilinghan. «Axirqi sinaq», « qizning qelbi» namliq hékayilirini élan qilish imkanyiti bolmay, yashlar arisida qolyazma halette tarqilip ketken. 1966-Yili «medeniyet zor inqilabi» bashlinip, ediblerning béshigha nurghun japa-musheqqet, bésim-riyazet, azab-külpetler chüshken. Memtimin Hoshur «yéziqchiliq yéqin yolaydighan ish emesken!» Dep qelemni tashliwetken. 1978-Yilidin kéyin weziyette chong yaxshilinish bolghan. «Ili géziti» ning Tursun Létip, tursun zéridin, mömin sepiri, malik kéwir qatarliq muherrirliri Memtimin Hoshurni hékaye yézishqa ündigen, ilham –medet bergen. Memtimin Hoshur 1978-yildin kéyin qolgha qaytidin qelem élip « güldeste» namliq bir hékaye yazghan. Bu hékaye «ili géziti» de élan qilinghan. Xenzuchigha terjime qilinghan. «Shinjang géziti» de qayta bésilghan. Memtimin Hoshur bu hékayining ilhami bilen «jengchi», «yol»,« ney awazi», «oqutquchi», « juxar güli», « üch tüp köchet», «ustam», « ikki parche xet» ,… qatarliq hékayilerni yazghan.
1978-Yili kechküzde ili wilayiti ghulja shehride edebiy ijadiyet yighini achqan. Bu yighingha «tarim» zhornili tehrrir bölümidin Qahar Jélil alayten kelgen. Shu chaghda «tarim» zhornili tehrrir bölümining mesuli muhemmet shawdun Qahar Jélil ghuljigha méngishning aldida Memtimin Hoshurning edebiy ijadiyet ehwalini sürüshturup béqishini, eger Memtimin Hoshur xalisa ishchi-déhqan-esker aptur qatarida «tarim» zhornili tehrrir bölümige kilip bir nechche ay ishlesh teklipini yetküzüp qoyushni taplighan. Bu heqte töhpikar zhornalisit, edib muhemmet shawdun « men we ili apturliri» namliq maqaliside mundaq deydu:
– «…. Shundaq künlerning biride yoldash Qahar Jélilni ghuljigha kamandurupkigha ewetidighan bolduq. Eyni chaghda‹ alma› dégen hékayini yézip ewetken Memtimin Hoshur birdinbir hékaye yazghan istudént bolghachqa, uning hékayisining nami bilen özining ismi ésimde qalghaniken. Bir küni birsining öyide ghuljidin kelgen bir edebiyat heweskari bilen parangliship qélip: --«medeniyet zor inqilabi» bashlinishtin bir yil ilgiri shinjang unwérsitétida oquydighan Memtimin Hoshur dégen bir ghuljiliq bala «alma» dep bir hékaye yazghaniken.Shu hékayidin qarighanda, uning qelimidin ümid bar idi. Pat-pat shu balini esleymen. U barmidu? Bolsa nedidu? -Dédim. Héliqi kishi uni bildighanliqi, ghulja sheherlik sheher memuriyiti qurulush idariside ishleydighanliqini éytti. Men bu kütülmigen uchurni anglap xush bolghanidim. Qahar Jélil ghuljigha mangidighan chaghda uninggha wezipe tapshurup, ghuljigha barghandin kéyin Memtimin Hoshurni izdep tépishni, eger u xalisa, ishchi-déhqan-esker aptor qatarida tehrrir bölümige teklip qilip bir nechche ay ishlitishni taplidim. Qahar jilil qaytip kélip, Memtimin Hoshurning idarisi ruxset qilsa özining tehrrir bölümge kélishni xalaydighanliqini éytti. Men derhal alaqe yazdurup, Memtimin Hoshurning idarisige ewettim. Uzaq ötmey Memtimin Hoshur tehrrir bölümimizge keldi, men uni nesiriy eser tehrrirleshke orunlashturdum» («tarim» zhornilining 2014-yilliq 5-sani, 144-, 145-betler).
Memtimin Hoshur «tarim» zhornilida élan qilinghan tunji hékayisi «oqutquchi» ning qandaq élan qilinghanliqi, «tarim» zhornili tehrrir bölümide qandaq chiniqqanliqi heqqidiki ishlarni eslep, « ‹tarim›- bediiy yétekchim » namliq maqaliside mundaq deydu: « … judunluq künler ötüp 1978-yilgha kelgende, qolumgha qayta qelem élip yazghan tunji hékayem- ‹güldeste›‹shinjang géziti› de élan qilindi. Arqidin ‹ili géziti› ge ‹jengchi›, ‹yol›, ‹ney awazi›,… qatarliq hékayilirim bésildi. Shu yili kechküzde ili wilayiti ghuljida ijadiyet yighini chaqirdi. Bu yighingha ‹tarim› zhornili tehrir bölümide mesul bolup ishlewatqan yoldash muhemmet shawudun Qahar Jélilgha méning ijadiye ehwalimni öginip béqishni taplighaniken. Qahar Jélil men bilen tonushup, «oqutquchi» dégen bir parche hékayemni élip ketti. Bu hékaye «tarim» zhornilida bésilghan tunji esirim bolup qaldi. Bu xuddi «tarim»ning muherirliri méni«tarim» zhornilining ishikidin özliri bashlap ekirip qoyghandekla ish boldi. Hazir oylisam, zhornal muherirlirining töwendiki apturlarni bayqap, yéteklep méngishimu muhim ish iken » («tarim» zhornili 1990-yilliq 9-san).
Yazghuchi Memtimin Hoshur «tarim» zhornilida «oqutquchi» namliq hékayisini élan qilip edebiy ijadiyet qizghinliqi ashqan. Yazghuchi Memtimin Hoshur shundin kéyin «tarim» zhornilining nopuzi yuqiri, eser tallashtiki ölchimi qattiq dep tonup, özige yuqiri telep qoyup, edebiy ijadiyette izchil yuqiri örlidi. Eng yaxshi yézilghan dep qarighan eserlirini «tarim» zhorniligha ewetishke aldiridi. Netijide yazghuchi Memtimin Hoshur oqurmenler yaqturghan yaxshi eserlirining köpinchisini« tarim» zhornilida élan qildi. Yazghuchi Memtimin Hoshur «tarim» zhornili tehrrir bölümi özi achqan we «tarim» zhornili tehrrir bölümi bilen her qaysi yerlik zhornal tehrrir bölümliri bérliship achqan edebiy ijadiyet muhakime yighinlirigha izchil qatniship, yazghuchi, shairlar bilen tonushush, turmush öginish, ustaz ediblerning edebiy ijadiyet tejribe, sawaqlirini öginish pursitige irishti. Netijide yazghuchi Memtimin Hoshur tediriji halda, edebiy ijadiyet qoshunining ümidlik tayanch küchke aylanghan, edebiy ijadiyetke bolghan qiziqish-hewisi hessilep éship, bügünki zaman Uyghur edebiyatimizdiki orni tediriji muqimlashqan.
Yazghuchi memtimi hoshur 1990-yillarda «tarim» zhornilida arqa-arqidin « burut majrasi» (« tarim »zhornili 1991-yilliq 1-san), «qirliq istakan» («tarim »zhornili 1991-yilliq 8-san), « musapirlar qawiqida» (« tarim »zhornili 1991-yilliq 4-san), « altun chishliq it» (« tarim » zhornili 1993-yilliq 10-san), «ölükke xet» («tarim» zhornili 1992-yilliq 4-san), «char xoraz» («tarim» zhornili 1995-yilliq 8-san), «xasiyetlik qar» («tarim» zhornili 1993-yilliq 4-,5-san), «oyghaq turup körgen chüshler» («tarim» zhornili 1998-yilliq 4-san , «dap» («tarim» zhornili 1998-yilliq 7-san), «qum basqan sheher» (romandin parche) («tarim» zhornili 1996-yilliq 8-san) qatarliq bir türküm munewwer eserlerni élan qilip, Uyghur pirozichiliqdiki aldinqi qatardiki yazghuchi dep teriplendi. Memliket ichi we sirtighimu biraqla tonuldi.
Démek, yazghuchi Memtimin Hoshur «tarim» zhornili arqiliq meshhur yazghuchigha aylandi. Öz nöwitide «tarim» zhornili tehrir bölümimu yazghuchi Memtimin Hoshurgha we uning edebiy ijadiytige alahide ehmiyet berdi. 1990-Yili yazghuchi Memtimin Hoshurning «bu chüsh emes» namliq hékayisi sh u a r tunji nöwetlik «‹tarim› edebiyat mukapati» gha, 1992-yili «ölükke xet» namliq hékayisi sh u a r boyiche «‹tarim›edebiyat mukapati»gha 2001-yili « burut majrasi» namliq hékayisi sh u a r boyiche «tarim» zhornili qurulghanliqining 50 yilliqini tebriklesh paalyitide «altun toy» mukapatigha érishti.
Yazghuchi Memtimin Hoshur «tarim» zhornilining 1997-yilliq 1-sanidin taki 2006-yilliq 4-sanighiche tehrir heyiti bolghan. «Tarim» zhornili 1985-yili sh u a r qurulghanliqining 30 yilliqini tebriklesh paaliyti yüzisidin tesis qilghan «bizning ediblirimiz» mexsus sehipiside «shadliq béghishlaydighan yol» («tarim» zhornili 1987-yilliq 4-san) dégen mawzuda tonushturdi. Yene «tarim» zhornilining 2004-yilliq 8-san muqawisning 2-bétide yazghuchi Memtimin Hoshurning süriti bérilgen. «Tarim» zhornili qurulghanliqining 50 yilliqini tebriklesh paalyitide yazghuchi Memtimin Hoshur «tarim» ning bügünki teqdiri üchün bash qaturush hemmeylenning ortaq mejburiyiti» dégen témida nutuq sözlidi. Nutuq tékisti töwndikiche:
– Hörmetlik rehberler, edib dostlar!
– Biz bügün ‹tarim› zhurnili dunyagha kelgenlikining 50 yilliqini qutluqlash üchün bu yerge jem bolduq. «Tarim» zhurnili ulugh jungxua xelq jumhuriytimiz bilen teng dégüdek dunyagha köz échip yérim esirlik uzun musapini bésip, keng ediblerni öz etrapigha ünümlük uyushturup, edebiyat qoshunimizni barghanséri ulghaytip, sotsiyalistik qurulush sépidiki her sahe ammigha üzlüksiz meniwi ozuqlarni ata qilip, bügünki bu pellige yétip keldi. «Tarim» zhurnilining 50 yilliq musapisi- partiyimizning ‹barche güller tekshi échilish, hemme éqimlar bes-beste sayrash› fangjénida, ‹edebiyat-senetni xelq üchün, ediblirimiz üchün, sotsiyalizim üchün xizmet qildurush› toghra yönilishide ching turghan, ediblirimiz üchün keng maharet körstish meydani hazirlap bergen, yash küchler üchün terbiyilinish mektipi bolghan, bügünki zaman Uyghur edebiy tilining shekillinishi we Uyghur edebiyatining bügüni üchün puxta asas yaratqan shanliq musape.
Tarim zhurnili dunyagha kelgen eyni yillarda memlikitimizde téxi yéngi jungguning az sanliq millet tilida chiqidighan edebiy zhurnallirini qandaq ishlesh, qandaq bashqurush jehetlerde teyyar ülgiler yoq idi. ‹Tarim› yol échip ilgirileshke jüret qilghan bashlamchi zhurnal. U eyni yillarda achqan ‹qérindash milletler edebiyati›, ‹dunya edebiyati›, ‹xelq éghiz edebiyati›, ‹klassik edebiyattin parchilar›,… qatarliq sehipiliri bilen bügünki ‹dunya edebiyati›, ‹miras›, ‹shinjang seniti›, ‹bulaq›, ‹edebiy terjimler› zhurnalliri üchün asas yaratqan; shundaqla partiye 11-nöwetlik merkiziy komitéti 3-omumiy yighinidin kéyin arqa-arqidin dunyagha kelgen her qaysi yerlik edebiy zhurnallar üchün zhurnalchiliqta deslepki örnek bolghan ana zhurnal.
Shu uzun yillarda‹tarim› zhurnilida ishligen japakesh muherrirlirimiz, ediblirimizning eserliri üstide ünchiqmay, nam-nishan qoghlashmay, ejir bilen töküp, qanche jansiz eserlerge hayatiy küch bexsh etti, qanche yash küchlerni qatargha qatti, qanche namsiz shexislerni hörmet sehnisige chiqardi. Men barliq ediblirimizge wakaliten ‹tarim› zhurnili üchün japaliq ejir singdürüp wapat bolghan muherrirlirimizni séghinish bilen esleymen; ‹tarim› zhurnilida ishlep dem élishqa chiqqan we hazirghiche zhurnalda ishlewatqan barliq péshqedem muherrirlirimizde aliy hörmet bildürimen. Shu uzun yillarda munewwer ediblirimiz özining qaynaq héssiyat, arzu-ümid, edebiy ijadiyettiki yéngi izdinishlirini ‹tarim› ning sehipisige töküp, qehrimanlirimizning ajayip obrazini, zamanimizning ésil kartinilirini sizip chiqti. Oqurmenlirimiz hayat, turmush toghrisidiki oy-xiyallirigha shu eserlerdin jawab tapti; meniwi teshnaliqini ‹tarim› ning örkeshlep turghan éqinidin su ichip qandurdi. ‹Tarim› zhurnilining yérim esiridin buyanqi millitimizning meniwi medenyitini toluqlash jehette qoshqan töhpisni héchqandaq maddiy qimmet bilen ölchigili bolmaydu.
‹Tarim› zhurnili bügünki islahat dolqunida nurghun edebiy zhurnallar teng mewjut bolup turghan sharaitta yéngi xiris, yéngi riqabetlerge duch keldi. ‹Tarim› zhurnilining qelem heqqining töwen bolushi, zhurnalning tehrirat orni bilen iqtisadiy ünüm hasil qilidighan bésip-tarqitish ornining ikki terepte bolushi islahattin ilgiriki dewdin qélip qalghan binormal ehwal, bu hazirqi bazar igiliki sharitida ‹tarim› ning öz iqtisadigha özi mesul bolup musteqi rawajlinishigha tamamen paydisiz. Yérim esiridin béri millitimizning meniwiyitini toluqlap kelgen ‹tarim› zhurnilining bügünki partkom we xelq hökümitidiki alaqidar rehbiriy yoldashlar we aptonom rayonluq edebiyat-senetchiler birleshmisi partguruppisi bu mesilini muwapiq hel qilish üstide akitp izdenmekte. Bügün ‹tarim› ning 50yilliq toyining mushundaq daghdughiliq ötküzülüshi we bu merikige dölet, aptonom rayon rehberlirimizning shexsen özi kélip qatniship ishlirimizgha yolyoruq bérishi partiye, hökümitimizning ‹tarim› zhurniligha bolghan ishench, ümidini, keng ediblirimizge bolghan hörmet we ghemxorluqini ekis ettüridu. Men aptonom rayonluq yazghuchilar jemiyitige wakaliten bügünki yighilishqa qedem teshrip qilghan Tömür Dawamet, ablet abduréshit, ismayil tilwaldi bashliq rehberlirimizge köptin-köp rehmet éytimen.
Ediblirimizning ‹tarim› zhurnilini eng yaxshi eserliri bilen qollishini, ‹tarim› zhurnilining ilgiriki yaxshi enenilirige warisliq qilip, öz etrapigha küchlük edibler qoshunini jelp qilip, yéngi dewr, yéngi esirge munasip zhurnal bolushini ümid qilimen».
«Tarim» zhornili tehrir bölümi yazghuchi Memtimin Hoshurning edebiy ijadiytige ait obzor maqalilarni arqa-arqidin élan qilip, yazghuchining edebiy ijadiyet netijilirini tonushturushqa, gewdilendurushke izchil ehmiyet bérip keldi. Mesilen, Ekber Qadir, perhat jamallarning«yazghuchi Memtimin Hoshur bilen söhbet» («tarim» 1993-yilliq 10-san), Abduréhim Ötkürning «yazghuchi Memtimin Hoshurgha ochuq xet» («tarim» zhurnili 1994-yilliq 3-san), abdusalam abdushükürning«Memtimin Hoshur hékayilirining bayan shekli we pérsonazhlirining ichki dunyasi»(«tarim» zhurnili 1998-yilliq 3-san), ehed dawutning « Memtimin Hoshur hékayilirining bezi alahidilikliri»(«tarim» zhurnili 2000-yilliq 4-san), xelchem réshitning «altun chishliq it» tin tughulghan oy-pikirler» («tarim» 1996-yilliq 6-san), Ismayil Tömürning «‹altun chishliq it›toghrisida»(«tarim» zhurnili1996-yilliq 6-san), kérimjan abduréhimning «Memtimin Hoshur chatma hékayichiliqining bashlinishi» («tarim» zhurnili 1998-yilliq 9-san), erkin emet torkanning «Memtimin Hoshurning edebiy muweppeqiyetliri we eserliridiki xahishchanliq toghrisida» («tarim» zhurnili 2007-yilliq 1-san), peride malikning «Memtimin Hoshur bilen söhbet» («tarim» zhurnili 2002-yilliq 3-san), qasim sidiqning «chinliqning rehimsiz yüzi»(«tarim» zhurnili 2013-yilliq 6-san),… namliq maqale-obzorliri bes-beste élan qilinip «Memtimin Hoshur tetqiqati» ning shekillinishnige asas saldi.
Menbe: «tarim» zhornili 2016-yilliq 5-san
